Pandemia i mbyll dyert hotel “Tiranës” në kryeqytet. Në funksion që në vitin 1979, hotel “Tirana”, i njohur ndryshe si 15-katëshi, ka mbyllur përkohësisht çdo shërbim, për shkak të krizës së pandemisë.
Siç raporton “Monitor”, që u referohet burimeve brenda stafit menaxhues, hoteli është mbajtur hapur me humbje të mëdha që nga tërmeti i 26 nëntorit dhe përgjatë gjithë periudhës që ka pasuar.
Me pezullimin e shërbimeve, stafi do të përfitojë asistencën sociale sipas ligjeve në fuqi, me shpresën e rikthimit në punë me përmirësimin e situatës.
Hotel Tirana me 170 dhoma është një nga ofruesit më të mëdhenj të shërbimit të konferencave.
Hotel Tirana International ka qenë prej vitesh në listën e monumenteve të kulturës deri në vitin 2015, kur ky status iu hoq me vendim të Ministrisë së Kulturës.
Ai është në pronësi të sipërmarrësit Ramë Geci, i cili në vitin 2012 u bë 100% pronar i “Hotel Tirana International”, teksa vlera e hotelit arriti 37.5 milionë euro.