Deputeti opozitar Halit Valteri nga foltorja e Kuvendit ka shpërthyer në akuza ndaj qeverisë por dhe opozitës jashtëparlamentare sa i takon shtyrjes së çeljes së negociatave me BE.
Ai pohoi se vendi ka përfunduar në duart e oligarkëve, ndërkohë që vet liderët e partive politike edhe dhembët i rregullojnë në klinika europiane jashtë vendit. Mes të tjerash Valteri tha se negociatat nuk do të hapen nëse të korruptuarit nuk shkojnë para drejtësisë.
“Askush nuk pretendon që Europa t’na hapë dyert në kohën kur të gjithë parat e shqiptarëve shpërndahen vetëm në pesë duar. S’mund të hapen negociatat për sa kohë hajduti i votave të shqiptarëve Damian Gjiknuri qëndron i patrazuar në Kuvend dhe bën marrëveshje me PD-në se si të vjedhë shqiptarët.
Ta mbledhim mendjen njëherë e mirë se s’mund të integrohemi në BE pa u çuar Gjiknuri me shokë para drejtësisë. Pasi jo vetëm që s’do ketë kurrë negociata, por në vend që vendi të ecë përpara, do të kthehet 200 vjet mbrapa. Si mund të merret me mend që të ndodhi që Rama dhe Basha ta izolojnë realisht vendin nga Europa, kurse politika të marrë vendime politike që ta përshpejtojë integrimin europian të vendit.
Në Shqipëri Rama, Basha, Monika dhe shumë aktorë të tjerë ekonomikë dhe politikë nuk kanë asnjë interes që Shqipëria të integrohet në BE. Si asnjëherë më parë Shqipëria është e përçarë mes qytetarëve që vazhdojnë ende të duan një afrim me BE-në dhe këtyre emrave të fuqishëm antievropianë në veprim.
Për çfarë duhet ta dëshirojë anëtarësimin në BE të Shqipërisë Lulzim Basha, Edi Rama dhe Monika Kryemadhi që edhe kur rregullojnë dhëmbët shkojnë dhe i bëjnë në klinikat europiane, fëmijët e tyre i shkollojnë në universitet europiane, ndërsa realiteti i shoqërisë shqiptare i është larguar gjithnjë e më shumë integrimit europian, jo vetëm në politikë, por edhe në art, kulturë, shkencë dhe ekonomi.
Në fund fare, nëse do ishte e mundur, do i kërkoja znj.Olsa Muhametit, autore e emisionit “Përputhen” në TCH që të ftojë z.Basha dhe z.Rama në emision që t’i përputhë njëherë e mirë ashtu siç duhet para shqiptareve. Që të gjithë ne të tjerët pastaj të biem rehat për herë të fundit”, tha Valteri./Bl.Ba/Fjala.al
