Ndarja nga jeta e Kasem Hysenbelliut/ Veliaj: Ditë e trishtë për gazetarinë. Balla: Lamtumirë mik
Kryetari i Bashkisë së Tiranës, Erion Veliaj dhe Kreu i Grupit Parlamentar të PS, Taulant Balla kanë shprehur ngushëllimet familjes për ndarjen e parakohshme nga jeta si pasojë e Covid-19, të themeluesit të televizionit “Fax News”, Kasem Hysenbelliu.
Me anë të një postimi në rrjetet sociale Veliaj shkruan se Hysenbelliu ishte njeri me guxim, duke vlerësuar punën e tij në dy televizione të rëndësishme në vend.
“Kasëm Hysenbelliu investoi në median shqiptare me guximin e njeriut që e donte gazetarinë e mirë & për shumë vite administroi me sukses dy televizione.
Sot ai u nda nga jeta, ditë e trishtë për gazetarinë & këdo që e njohu e punoi me të. Ngushëllime familjes! U prehtë në paqe!”, shkruan kryebashkiaku.
Ndërsa Balla përmes një statusi në Twitter, krahas fotos së Hysenbelliut, Balla shkruan: “Lamtumirë miku im i mirë!”
Kujtojmë që biznesmeni i suksesshëm, Kasem Hysenbelliu u nda nga jeta mëngjesin e sotëm në Turqi, ku ndodhej i shtruar prej disa javësh, si pasojë e komplikacioneve të shfaqura nga Covid-19.
Pavarësisht përpjekjeve të mëdha të mjekëve dhe lutjeve të familjarëve apo miqve të tij, ai nuk mundi të fitojë ndaj pabesisë së virusit./Bl.Ba/Fjala.al
