Moti i keq që ka përfshirë vendin që prej mbrëmjen së djeshme, parashikohet që sot të pësojë një përkeqësim. Vlora është një nga qytetet më të prekura nga stuhia dhe era e fortë.
Në këtë mënyrë, drejtuesit e bashkisë u kanë bërë thirrje qytetarëve vlonjatë që të shmangin të gjitha lëvizjet me makina për shkak të shirave të dendur dhe erërave të forta që priten në vijim. Ndërkaq, dje autoriteti portual njoftoi pezullimin e lundrimit për anijet e vogla dhe ato të peshkimit.
“Të dashur qytetarë! Duke parë kushtet e motit në Vlorë, por edhe në të gjithë vendin, do ju luteshim të shmangnit të gjitha lëvizjet me makina për shkak të shirave të dendur dhe erërave të forta që priten në vijim.
Kujdesuni për veten dhe familjarët tuaj! Për çdo nevojë vendosni kontakt me Ujësjellës Kanalizimet dhe Shërbimet publike të Bashkisë“, thuhet në njoftimin e bashkisë që drejtohet nga Dritan Leli.
Sipas parashikimit të metereologëve, sot moti do të jetë me vranësira mesatare deri të dendura, të cilat do të pasohen nga reshje shiu me intesitet kryesor në zonën Jug-Perëndimore.
Era do të jetë jetë me drejtim Jug-Perëndim me shpejtësi deri në 10-20 m/sek. Valëzimi do të jetë i forcës 6 me lartësi vale 1.5 deri në 2.0 metër në det hapur.Temperaturat do të jenë me rënie në mesditë./Bl.Ba/Fjala.al
