Presidenti i FSHF-së flet pas hedhjes së shortit të Eliminatoreve të Botërorit “Katar 2022”. Ndryshe nga trajneri i Kombëtares, Edoardo, i cili ka reaguar për shortin e Eliminatoreve të Botërorit “Katar 2022” nëpërmjet një videokonference për gazetarët sportivë shqiptarë, presidenti i Federatës Shqiptare të Futbollit, Armand Duka, ka zgjedhur rrjetet sociale për të dhënë mendimin e tij për grupin e kuqezinjve.
“Grupi I i Botërorit, është një grup i vështirë”, – shkruan kreu i organizmit që qeveris futbollin në vend në një postim të shkurtër. “Anglia, Polonia, Hungaria, Andorra dhe San Marino do të jenë skuadrat tona kundërshtare, – ka vijuar ai. – Do të ishte e bukur një fitore në “Uembli”. Tek të tjerat duhet të bëjmë maksimumin. Na duhet që të sfidojmë Poloninë dhe Hungarinë brenda dhe jashtë.”
“Të mos bëjmë asnjë hap fals me Andorrën dhe San Marinon”, – ka shtuar ai. – Ashtu si trajneri kuqezi, edhe Duka e ka një synim konkret në këtë grup. “Objektivi real është vendi i tretë, – ka pohuar presidenti i FSHF-së. – Por hap pas hapi s’duhet të mos mendojmë play-off-in. Gjithmonë me objektivin për të patur një skuadër, që synon kualifikimin në Euro 2024.”
Shqipëria ka njohur të hënën në mbrëmje kundërshtaret e saj në Eliminatoret e Botërorit “Katar 2022”, dhe ndeshjet do të luhen përgjatë vitit të ardhshëm./Bl.Ba/Fjala.al
