Laçi ka gjetur trajnerin e saj të ri dhe ai do të jetë Shpëtim Duro. Një gjë të tillë e kanë konfirmuar të premten në mbrëmje posaçërisht për Fjala.al burime zyrtare pranë klubit kurbinas, ndonëse kjo ende nuk është shpallur zyrtarisht.
Në fakt, pas largimit në ditët e fundit të nëntorit të trajnerit Armand Cungu, teksa nën drejtimin e tij skuadra mori vetëm 3 pikë në 4 javë, stoli i Laçit kishte mbetur bosh dhe fillimisht, drejtimin e mori veterani Stavri Nica, i cila e udhëhoqi ekipin drejt fitores 6-1 në shtëpi ndaj Apolonisë dhe drejt barazimit 1-1 në Korçë përballë Skënderbeut.
Ndërsa në humbjen minimale, 0-1 në shtëpi përballë Tiranës, skuadrën kurbinase e drejtori ndihmëstrajneri Klevis Hima. Dhe, përtej zërave se në stolin laçjan po vinte një emër i njohur ndërkombëtarisht, si austriaku Peter Pakult, duket se presidenca kurbinase ka zgjedhur një emër të njohur të stolave shqiptarë, si Shpëtim Duro.
60-vjeçari ka drejtuar një numër të madh skuadrash në Shqipëri, që nga viti 1999, të tilla si Bylisin, Dinamon, Apoloninë, Partizani, Besën, Skënderbeun, Vllazninë, Flamurtarin dhe, së fundmi, Kukësin, ndërsa ka drejtuar edhe dy herë Shkëndijën e Tetovës në Maqedoninë e Veriut dhe Dritën e Gjilanit në Kosovë.
Ai ka qenë për një edicion edhe ndihmëtrajner i Kombëtares kuqezi, në periudhën 2006-2007. Duro e merr Laçin me vetëm 7 pikë të grumbulluara në po aq javë, teksa mban vendin e 7-të në renditje, 9 pikë pas Vllaznisë kryesuese.
Pa.Va/Fjala.al
