Në vigjilje të festave të fundvitit është rikthyer edhe fluksi i emigrantëve që nga vendet fqinje, ku jetojnë e punojnë, vijnë për të kaluar Krishtlindjen dhe ndërrimin e viteve me familjet e tyre në Shqipëri.
Pandemia, gjithsesi, ka sjellë një ulje të ndjeshme të lëvizjeve. Këtë të diel, në pikën kufitare të portit të Durrësit, 3 tragetet e linjave Bari-Durrës dhe Ankona-Durrës, janë rreth 3800 udhëtarë dhe 460 mjetet që vijnë nga Italia.
Policia Kufitare po punon me kapacitet të plotë, me 20 sportele, në funksion të udhëtarëve dhe mjeteve që priten të mbërrijnë edhe gjatë ditëve në vijim nga Italia, ku lëvizjet e qytetarëve kufizohen nga data24 dhjetor duke klasifikuar të gjithë vendin “zonë të kuqe”.
Edhe në pikën kufitare të Kapshticës nuk kanë munguar emigrantët e kthyer nga Greqia, ndonëse fluksi mbetet i ulët. Pas hapjes së pjesshme të doganës, vetëm për datën 19 dhjetor në Kapshticë, kanë hyrë 552 shtetas dhe 133 mjete, ndërkohë vijon të mos lejohet lëvizja e automjeteve të vogla, taksive dhe autobusëve. Emigrantët mbërrijnë në doganën greke me taksi, kalojnë në këmbë dhe më pas sërish me taksi ose mjete familjare shkojnë në banesat e tyre.
l.m/Fjala.al
