Ndryshe nga çdo vit tjetër, këtë herë në katedralen “Ngjallja e Krishtit” në Korçë u krye vetëm rituali i bekimit të ujit, një simbolikë e pastërtisë, jetës dhe shpëtimit për besimtarët e krishterë ortodoksë.
Këta të fundit marrin në bidonë ujin e bekuar dhe e çojnë në shtëpitë e tyre pasi besojnë se ka veti shëruese dhe duhet konsumuar kur këta të fundit kanë probleme shëndetësore.
Ka munguar rituali i Epifanisë (hedhjes së kryqit në ujë), ku vitet e kaluara me dhjetëra të rinj sfidonin temperaturat e ulëta për të kapur kryqin e bekuar, ndërkohë këtë vit nuk është zhvilluar për shkak të masave parandaluese anticovid në vendin tonë.
Gjithashtu edhe në Durrës, si asnjëherë tjetër nuk do të hidhet kryqi në ujë. Kisha Ortodokse ka marrë vendimin që të mos organizojë ceremoninë e Ditës së Ujit të Bekuar, që konsiston me hedhjen e kryqit në ujë.
Kjo ceremoni është traditë të organizohet në detin Adriatik, pranë portit të qytetit. Ndërkohë, autoritet e kishës Ortodokse kanë njoftuar vetëm për një ceremoni meshë që do ë mbahet në kishën e Shën Astit dhe Shën Pavlit.
Dita e 6 janarit, është shumë e rëndësishme për besimtarët ortodoksë, pasi simbolizon ditën e shenjtë të “Ujit të bekuar”.
Kjo festë është shprehja e faktit më qendror të vizionit të krishterë për njeriun si dhe për jetën e botën e tij. Shenjtërimi i ujit vërtetohet sot nga të krishterët, të cilët në çdo 6 janar mbushin ujë të bekuar, i cili qëndron i freskët deri në 6 janarin e vitit tjetër./Bl.Ba/Fjala.al
