Presidentja në detyrë e Kosovës, Vjosa Osmani ka shpërndarë ditën e sotme parlamentin dhe ka caktuar datën e zgjedhjeve të parakohshme më 14 shkurt.
“Duke u bazuar në përgjegjësitë kushtetuese dhe Aktgjykimin e Gjykatës Kushtetuese Nr. KO-95/20, si dhe pas diskutimit me partitë parlamentare dhe Komisionin Qendror të Zgjedhjeve, u.d. Presidentja, dr.Vjosa Osmani, ka marrë vendim të shpallë zgjedhjet dhe të caktojë 14 shkurtin 2021 datë për mbajtjen e zgjedhjeve parlamentare të parakohshme. Më këtë vendim KQZ-ja është udhëzuar t`i ndërmarrë të gjitha veprimet e nevojshme për organizimin dhe mbajtjen e zgjedhjeve për Kuvendin e Republikës së Kosovës. U.d. Presidentja po ashtu ka nxjerrë Dekret për shpërndarjen e Legjislaturës së shtatë të Kuvendit të Republikës së Kosovës”, njofton presidenca e Kosovës.
Ky vendin vjen pasi Gjykata Kushtetuese i dha të drejtë Albin Kurtit, duke e shpallur të pavlefshme votën e deputetit Etem Arifi për formimin e qeverisë Hoti me argumentin se s’kishte pasur legjitimitet në momentin kur kishte votuar, meqë ishte dënuar nga Gjykata me vendim të prerë.
