Reshjet e shumta të shiut në Lezhë kanë shkaktuar shëmbje dherash në disa zona si; Torovici, Balldre, në lagjen Varosh, në Rrëshen dhe në Fan.
Mësohet se ky fenomen rrezikon disa banesa të cilat gjenden pranë zonëve në fjalë, por pavarësisht situatës së rëndë për këto zona, lumi Drin është rikthyer në shtratin e tij.
Sipas raporteve, deri më tani nuk ka shtim të sipërfaqeve të përmbytura, ndërsa rrezik mbetet rrëshqitja e dherave.
Gjatë gjithë natës në Lezhë, forcat e ushtrisë kanë ndenjur në gatishmëri duke qenë se situata parashikohej të agravohej.
Ndërkohë niveli i ujit në lumin Drin ka rënë me rreth 40 cm. Ndërsa bëhet e ditur se ka një tërheqje të konsiderueshme të ujit dhe nga tokat bujqësore të përmbytura.
Në këtë situatë ka ndikuar ndërprerja e reshjeve si dhe funksionimi i hidrovoreve me kapacitet të plotë gjatë natës.
Ndërsa edhe në qytetin e Vlorës janë përmirësuar kushtet atmosferike. Prurjet e lumit Vjosë kanë vijuar gjatë natës, teksa niveli i lumit arriti në 7.1 m ku aktualisht niveli ka rënë në 6.9 m.
Gjithashtu është evakuuar një familje në fshatin Fitore, si dhe janë ndihmuar për kalimin në katet më të larta të shtëpive të tyre edhe 4 familje të tjera./Bl.Ba/Fjala.al
