“Shqipëria garon për të shpëtuar fëmijë nga kampi xhihadist”! Kështu është titulli i një reportazhi të bërë nga BBC për Shqipërinë dhe operacionet e nisura për shpëtimin e fëmijëve shqiptar nga kampi i ferrit i quajtur ‘Al Hol.
Shkrimi nis me historinë e Eva Dumanit, motrën e Endrit, e cila nuk u kthye në Shqipëri së bashku me vëllanë e saj. Nga informacionet që u raportua ishte se Eva ishte fshehur pasi nuk dëshironte që të kthehej, por një fakt i tillë nuk u konfirmua kurrë. Në shkrim thekson se publikimi i fotos së saj mund t’i rrezikonte jetën, për këtë arsye janë treguar të kursyer.
“Fytyra e zbehtë e Evës shkëlqen e mbuluar nga shalli dhe kapuçi i saj i zi. Sytë e saj të kaftë të zbehtë shikojnë drejt e në kamerë. Sot 16 vjeç, ajo u rrëmbye nga babai i saj Shkëlzen dhe u dërgua në Siri kur ajo ishte vetëm nëntë vjeç. Ne nuk mund ta publikojmë fotografinë e saj sepse mund t’i rrezikojmë. Eva është akoma në kampin al-Hol në Sirinë veriore, ku u mor me mbi 70,000 jetime të tjera dhe të veja të luftëtarëve xhihadistë të Shtetit Islamik”, nis shkrimi.
Shkrimi vijon me një citim të ish- ministrit të Brendshëm, Sandër Lleshaj i cili ka thënë se ‘Çdo fëmijë i sjellë në shtëpi është një shqiptar më shumë, dhe një terrorist më pak’
“Ne mendojmë se ka një detyrim moral për të riatdhesuar të paktën fëmijët, sepse ata nuk janë terroristë, ata janë viktima të prindërve të tyre të papërgjegjshëm. Por ata mund të rriten në monstra të vërtetë nëse i lëmë në kampe dhe i injorojmë,” mësohet t’i ketë thënë Lleshaj BBC.
BBC ka takuar disa familjarë të shqiptarëve nga Shqipëria, por edhe nga Maqedonia dhe përpjekjet që kanë bërë ata për t’i shpëtuar të afërmit e tyre, e megjithatë sytë janë sërish nga shteti, pasi shpëtimi duhet shumë i vështirë, për të mos thënë i pamundur.
Më 26 tetor u përmbyll me sukses operacioni për kthimin e 4 fëmijëve, Amar Rasha, Emel Rasha dhe Hatixhe Rasha dhe nëna e tyre Floresha Rasha (e plagosur në Siri) dhe të Endri Dumanit. Në kamp vijon të jetë motra e Endrit, Eva, ku sipas burimeve ajo është fshehur sepse nuk ka dashur që të rikthehet.
