Valentina Tereshkova është kozmonautja legjendare sovjetike që njihet dhe si gruaja e para në hapësirë, raporton agjencia Tass.
Në përfundim të misionit të saj Tereshkova është përgëzuar nga Sekretari i Parë i BRSS, Nikita Hrushov, por vite më pas është pritur në një takim të veçantë dhe nga presidenti Vladimir Putin. Ndërkohë Valentina Tereshkova ka një fotografi dhe me kozmonautin sovjetik, i pari që doli në hapësirë, Juri Gagarin.
Gruaja e parë fare në hapësirë, Valentina Tereshkova, lindi më 6 mars 1937. Në vitin 1969 u diplomua nga “Hapësira Ajrore Zhukovsky” dhe “Akademia Inxhinieri” (si inxhiniere e hapësirës). Ajo ishte një nga 58 vajzat e para që kishin aplikuar për pjesëmarrje në programin hapësinor sovjetik për t’u regjistruar në 12 mars 1962. U përzgjodh mes 5 finalisteve, për të pilotuar Vostok 6 më 16 qershor 1963, duke u bërë njëkohësisht gruaja e parë dhe personi i parë civil që fluturonte në hapësirë, pasi ajo ishte e përfshirë vetëm në mënyrë honorifike në Forcat Ajrore të BRSS, me kushtin për t’iu bashkangjitur grupit të kozmonautëve. Valentina Tereshkova ishte 26 vjeç aso kohe.
Fluturimi i saj hapësinor zgjati gati tre ditë – 70 orë e 50 minuta, kohë gjatë së cilës ajo orbitoi globin 48 herë. Gjatë misionit treditor, ajo iu nënshtrua testeve të ndryshme, për të parë reagimin e një trupi femëror në hapësirë.
Valentina Tereshkova ende mbetet kozmonautja e vetme grua që ka kryer vetë një mision në hapësirë, dhe jo si një anëtare ekuipazhi.
l.m/Fjala.al
