Kryeministri Edi Rama ka deklaruar se në 7 vitet e qeverisjes së tij u shtuan 225 mijë vende të reja pune në Shqipëri.
Kreu i qeverisë teksa po fliste për premtimin për 300 mijë vende pune, sfidoi gazetarët që të kontrollojnë shifrat zyrtare.
“Kemi premtuar 300 mijë vende punë, dhe sot, duke ju referuar shifrave të regjistrit të punës në Shqipëri. Hapeni dhe shikojeni, ju që jeni ndërmjetësit mes palëve, politikës dhe qytetarëve. Hapeni dhe shikojeni dhe thuajuni njerëzve. Në 2013 ishte me 473 506 punonjës të regjistruar , në fund të 2019 ishte 698 235 punonjës të regjistruar.
Janë apo nuk janë 225 mijë shqiptarë më shumë që paguhen sipas vendit të punës së tyre”, deklaroi kryeministri Rama.
Ndërsa ministrja e Financave dhe Ekonomisë, Anila Denaj deklaroi se ndërtimi i një sistemi dhe regjistrave, përmes së cilëve kryqëzohen të dhënat në kohë reale për bizneset dhe individët ka përmirësuar ndjeshëm të ardhurat në buxhetin e shtetit.
“Jemi në mesin e një procesi rindërtimi të një sistemi të rëndësishëm, çka ka sjellë më shumë të ardhura që realisht ekonomia shqiptare prodhon në buxhet”, deklaroi Denaj gjatë konferencës së përbashkët me kryeministrin Edi Rama me fokus ekonominë.
Ministrja Denaj analizoi disa nga treguesit fiskal.
“Të ardhurat nga tatim fitimi në buxhetin e shtetit llogariten në fund të vitit 2019, 142% më të larta krahasuar me vitin 2013. Kjo rritje u ndikua vetëm në masën 25% nga rritja e taksës nga 10% në 2013 në 15%”, tha ministrja.
