“Në luftën për rendin dhe sigurinë publike kemi qenë të suksesshëm. Sipas të dhënave të kriminalitetit në Shqipëri, nga 2012-a është përgjysmuar krimi. Krimi i organizuar ka kaluar kufijtë kombëtarë dhe lufta ndaj tij duhet të jetë e përbashkët”. Është kjo një ndër arritjet e mazhorancës qeverisëse me të cilën do të shkojë tek elektorati për të kërkuar votën për mandatin e tretë, e konfirmuar nga deputetja socialiste, Ermonela Feja në Ditari në A2 CNN.
“Kemi polici të denjë që është pjesë e EUROPOL-it, jemi pjesë e FRONTEX për shkak të besimit të partnerëve. Kjo është arritje për mazhorancën qeverisëse. Të dhënat, flasin për krime të ndryshme që janë përgjysmuar, ndërkohë krimi i organizuar ka kaluar kufijtë kombëtarë dhe kjo ka ndodhur pasi bota është globalizuar. Lufta ndaj krimit duhet bërë e përbashkët në disa fronte. Krimi avancon më shpejt se shteti dhe i takon shtetit të mos mbetet prapa, dhe të ketë aftësi parashikuese”.
Felaj u shpreh e sigurt në mandatin e tretë qeverisës, të cilin e bazon te ndryshimi dhe reformat e thella të bëra nga partia e saj në pushtet. Sipas saj, rezultatet janë të prekshme për t’u ballafaquar sy më sy me njerëzit.
“Ne jemi në terren, prej 8 vitesh, çdo ditë, dhe kur flasim për mandat të tretë, kemi dhënë shembuj ndryshimi dhe reforma të rëndësishme në arsim e shëndetësi dhe rezultatet janë të gjitha të prekshme. Jemi treguar të përgjegjshëm, seriozë dhe të ndjekim pritshmëritë e atyre që na votuan e mbështetën. Mbi këtë bazë do të kërkojmë votën për mandatin e tretë të PS-së duke u ballafaquar sy më sy me njerëzit.
Të dhënit llogari atyre që të kanë mbështetur është thelbi. Ne jemi në fushatë njëherë në dy vjet dhe kjo është një periudhë e mirë për të bërë bilanc të gjërave. Vëmendja jonë është e pashkëputur nga punët dhe investimet publike. Në 2017, krijuam platformën e bashkëqeverisjes me njerëzit që ka filluar të funksionojë dhe shumë njerëz kanë gjetur zgjidhje. Vijmë nga një vit i vështirë. Synimi është të konsolidojmë financat publike dhe të zbusim efektet e tërmetit tragjik. Asgjë nuk vjen vetvetiu, është puna që do shprehë edhe rezultatet tona se do jenë maksimale”.
Sa i takon fushatës në qarkun e Beratit, ku ajo bën pjesë, Felaj theksoi se po punohet fort me çdo mbështetës me mënyra të tjera komunikimit për të tërhequr një pjesë të elektoratit.
“Mendoj që vetë situata na ka detyruar që të kemi qasje tjetër në bërjen e kësaj fushate. Po shohim mënyra të tjera komunikimi për të tërhequr një pjesë të elektoratit. Na duhet fort të punojmë me çdo mbështetës tonin për t’iu përgjigjur. Jo të gjitha gjërat janë bërë 100%, por kjo nuk do të thotë që kjo nuk është arsye që ne të tërhiqemi prapa”.
