Një ngjarje tronditëse është publikuar nga emisioni “Stop”, ku një grua me inicialet H. A ka ushtruar dhunë makabre ndaj vajzës së saj 3 vjeçe. Ngjarja ka ndodhur tre javë më parë në Korçë, ndërsa gruaja me origjinë nga Kukësi dhe banim në Durrës kishte shkuar për festat e fundvitit tek prindërit e të shoqit.
Gruaja ka kapur prej flokësh dhe ka përplasur në tokë vajzën e saj 3 vjeçe sepse ajo i kishte marrë telefonin. “Ishte një skenë makabre mëse e padurueshme”, tregoi denoncuesja. Ndërkohë në video dëgjohet një person që thërret: “Mos moj.. çfarë i bëre fëmijës moj. E vrave fëmijën moj”.
“Do ta vras mo pse ça! Është fëmija im nuk pyes fare”, dëgjohet gruaja në video.Familjarët kanë shkuar tek policia e Korçës, ku autoritetet arrestuan gruan në fjalë. Prokurori i Korçës, Julian Kristo, kërkoi 2 vite burg për nënën e dhunshme.
Gruaja që ka bërë denoncimin tek “Stop” ka deklaruar se mamaja e 3 vjeçares ka qëndruar vetëm 1 javë në paraburgim. Tani, ajo ndodhet në shtëpi me fëmijën dhe denoncuesja ka shprehur frikën se ajo mund ta vrasi vajzën e mitur nga momenti në moment.
Kjo nuk është hera e parë që nëna e ka dhunuar të voglën. Gjyqtari Ervin Sulaj e kishte zëvendësuar masën e “arrest me burg” në “detyrim paraqitje”, pa seanca psikologu.
“Të rikujtojmë që gjyqtari është nga Kukësi, prej nga është edhe mamaja e famijës. Çfarë do të thotë ky gjyqtar nëse fëmijës i ndodh diçka? Kush e mban përgjegjësinë nëse fëmija vdes?”, ka thënë denoncuesja.
Ndërkohë, psikologia Redina Balla Sulstarova ka thënë se situata është emergjente. Ajo ka shtuar se vajza e mitur është e pambrojtur dhe rrezikohet në çdo moment nga një krizë tjetër dhune nga nëna e saj me probleme mendore.
“Kemi një fëmijë 3-vjeçar që jeton me një nënë të dhunshme dhe një baba neglizhent. Duhet përjashtuar nëse nëna vuan nga ndonjë çrregullim, apo problem me çrregullim personaliteti dhe takimet e saj duhet të jenë të supervizuara. Nuk do të rekomandoja që fëmija të jetojë me nënën në atë gjendje”, tha ajo.
