Një 24-vjeçare me inicialet A.Sh është shoqëruar nga policia e Tiranës mbrëmjen e djeshme, si person që ka dijeni për abuzimin e të miturës në Vorë.
E mitura e cila ka ngritur padi, është paraqitur në Polici e shoqëruar nga e ëma dhe një psikologe.
Burime nga Policia e kryeqytetit thanë dje se ngjarja ka ndodhur në muajin nëntor të vitit që kaloi, por është denoncuar vetëm ditën e mërkurë, shkruan Panorama. Kanë qenë prindërit e vajzës së mitur, të cilët të shqetësuar për shkak se e bija refuzonte të shkonte në shkollë, kanë këmbëngulur që të zbulojnë arsyen, derisa 15-vjeçarja ka vendosur të flasë me të ëmën, duke i treguar çfarë i kishte ndodhur dy muaj më parë.
Mashtrimi dhe abuzimi
Të njëjtat burime thanë se shtetasja me inicialet A.Sh., 24 vjeçe, dyshohet se përmes mashtrimit e ka joshur të miturën, nxënëse në një shkollë 9-vjeçare në Vorë, që të shkonte në shtëpinë e saj në Tiranë. Në momentin që e mitura ka shkuar aty, 24- vjeçarja e ka detyruar që të kryenin marrëdhënie seksuale dhe më pas i ka bërë presion që të mos i tregonte askujt. Por duke qenë se e dyshuara e ka ftuar edhe kohët e fundit që të shkonte sërish në shtëpinë e saj, aty ku kishte qenë në muajin nëntor, 15-vjeçarja është ndjerë e frikësuar dhe për këtë arsye ka refuzuar që të shkonte në shkollë.
Këtë veprim ajo e ka bërë pasi dyshonte se vajza që kishte abuzuar seksualisht me të mund ta gjente në shkollë dhe nuk donte të përballej më me të. Për këtë arsye ajo ka vendosur që të qëndrojë në shtëpi, deri në momentin që e ëma ka mësuar të vërtetën dhe e ka bindur që të paraqiten në Polici për të bërë denoncim.
