Dalëngadalë, jeta sportive në po i rikthehet normalitetit dhe duket se Komiteti Teknik i Eksperteve është dorëzuar përballë presionit të madh për të lejuar të gjithë veprimtaritë sportive edhe në sallat e mbyllura, në një kohë kur Shqipëria ishte i vetmi vend në rajon dhe Evropë që ende nuk kishte lejuar rikthimin në parket të lojërave me dorë. Ashtu siç pritej, pas basketbollit është radha e volejbollit të marrë dritën jeshile për të rifilluar veprimtaritë sportive.
Me anë të një komunikate për mediat, Federata Shqiptare e Volejbollit ka bërë me dije se Ministria e Shëndetësisë dhe Mbrojtjes Sociale, ka pranuar kërkesën e tyre për të nisur të gjitha aktivitet zyrtare. Ndërsa klubet dhe shoqatat do të njihen menjëherë me rregullat e reja dhe protokollet sanitare që duhet të ndjekin.
“Në vijim të kontakteve të vazhdueshme që në fillim të sezonit që Federata Shqiptare e Volejbollit ka patur në Ministrinë e Shëndetësisë dhe Mbrojtjes Sociale, ka mbërritur edhe vendimi që hap dritën jeshile për rikthimin në parket të aktiviteteve zyrtare të volejbollit”, – shkruan njoftimi i FSHV-së.
“Brenda ditës së sotme do t’u komunikohet klubeve e shoqatave vendimi i Komitetit Ekzekutiv të FSHV-së, si dhe informacioni e protokolli mbi mënyrën sesi do të veprohet me masat anti-“COVID-19”, – vijon më tej ky njoftim, ndërsa në vijim pritet të mësohen edhe hollësitë. Në fakt, vonesa me disa ditë e vendimit për volejbollin teksa për basketbollin kishte ardhur ditë më parë, është disi e çuditshme nga ana e autoriteteve shëndetësore, teksa bëhej fjalë për të njëjtat mjedise loje.
