Dritëro Agolli, kolosi i letrave shqipe mbylli sytë më 3 shkurt 2017 në moshën 86-vjeçare. Shkrimtar, publicist, gazetar dhe politikan që ka lënë pas një trashëgimi të pasur kulturore për vendin.
Katër vite pas humbjes së tij, shtëpia e të madhit Dritëro do të kthehet në muze. Lajmi është bërë i ditur nga kryetari i Bashkisë Erion Veliaj, i cili shprehet se gjithçka është në rrugë të mbarë për të hapur muze shtëpinë e tij në “Rrugën e Dibrës”, ku jetoi e shkroi veprat e paarritshme.
Presidenti Ilir Meta shprehet se “Dritëroi ynë i madh dhe i paharruar dritëron përjetë në çdo varg, libër, mesazh e këshillë të mençur, që na la trashëgim të gjithëve”.
“Me rrënjët e thella në popull, shprehës i fuqishëm i shpirtit të shqiptarit të thjeshtë, të ndershëm, punëtor e patriot, Dritëroi do të jetë gjithmonë pranë nesh me idetë e tij të vyera në letërsi, art dhe politikë. Shumë mall për ty mik i shtrenjtë, që na mungon kaq shumë”, shprehet Meta.
Edhe vajza e tij, Elona, përmes një postimi në rrjetet sociale bën të ditur lajmin.
“Më 28 Janar 1974, babit iu dha e drejta e strehimit në Pallatin 85, të Rrugës së Dibrës (e quajtur atëherë Rruga “Bajram Curri”). Derisa mbylli sytë jetoi në këtë apartament. Tanimë, do të kthehet në shtëpi muze”, shkruan Elona Agolli.
