Duhet edhe një vit që të nisin Lojërat Olimpike Dimërore të Kinës. Vështirësitë e krijuara nga pandemia, ekzistojnë ende. Megjithatë punimet për ndërtimin e 12 objekteve sportive, ku do të zhvillohen këto lojëra, kanë përfunduar. Kështu, ka nisur numërimi mbrapsht, për nisjen e Lojërave Olimpike Dimërore “Pekin 2022”. Duhet edhe një vit deri në fillimin e kësaj olimpiade që deri tani i është dashur të përballojë vështirësitë e krijuara nga epidemia e “Covid-19”-ës, shqetësimet mbi abuzimet e pretenduara të të drejtave të njeriut, duke përfshirë një burgim masiv në Xinxhiang.
Lojërat Olimpike Dimërore janë planifikuar të fillojnë në 4 shkurt 2022, vetëm gjashtë muaj pas Lojërave Verore të Tokios, të cilat u shtynë për një vit për shkak të pandemisë. E me krizën globale të shkaktuar nga virusi korona, që nuk po tregon shenja zbutjeje, fati i Tokios mbetet ende i pasigurt pavarësisht insistimit të Japonisë që olimpiada do të shkojë përpara. Kina thotë se ndërtimi i objekteve të Olimpiadës, nuk është ndalur.
Dhe të 12 impiantet, që përfshijnë ndërtesa të reja si dhe rikonstruktimin e disa të tjerave, që kanë qenë që në Lojërat Olimpike Verore të 2008-ës. Kina siguron gjithashtu se jo vetëm që do të zhvillojë olimpiadën, por edhe do të jetë “një spektakël unik”. Komiteti Olimpik Ndërkombëtar (IOC) tha në një deklaratë për Agjencinë Franceze të Lajmeve (AFP) se “po shikon skenarët e mundshëm me të cilët mund të përballemi në Pekin vitin e ardhshëm”.
Një grup pune, duke përfshirë IOC, zyrtarët kinezë dhe të Organizatës Botërore të Shëndetësisë “po monitoron nga afër situatën globale të shëndetit, përparimin dhe shpërndarjen e vaksinave, metodat e testimit dhe zhvillime të tjera të mëdha shëndetësore dhe higjienike në lidhje me COVID-19″, – thuhej në deklaratë. “Lojërat Olimpike janë simboli më i fuqishëm në botë i unitetit në të gjithë larminë tonë”, -deklaroi IOC-ja.
Ndërsa Thomas Bach, President i Komitetit Olimpik Ndërkombëtar u shpreh se Pekini do të shkruajë historinë si qyteti i parë që organizon dy lojëra, verore dhe dimërore. Lojërat Olimpike Dimërore Pekin 2022 do të jenë një moment i shkëlqyeshëm për të sjellë botën të bashkuar në frymën e paqes, solidaritetit dhe miqësisë. Të dashur atletë dhe miq nga të gjitha komitetet olimpike kombëtare, mezi presim t’ju shohim në Pekin, pas një viti, për ceremoninë e hapjes së Lojërave Olimpike Dimërore Pekin 2022”, – tha presidenti Bah.
