Pas konsultimeve me klubet, janë fiksuar edhe datat e të gjitha niveleve. Volejbolli shqiptar nuk ka humbur kohë dhe, menjëherë sapo ka marrë “dritën jeshile” nga autoritetet shëndetësore në vend për kthimin në parket, ka përvijuar edhe rrugëtimin e sezonit të ri. Vetëm 24 orë pasi ka marrë miratimin për rikthimin në parket, në ditën e parë të shkurtit, volejbolli shqiptar vijoi të shpallte edhe kalendarët përkatës.
Nëpërmjet një shkrese të nënshkruar nga Sekretari i Përgjithshëm i Federatës Shqiptare të Volejbollit, u njoftua të gjitha shoqatat dhe klubet anëtare të saj se kampionatet e kupat për sezonin sportiv 2020-2021, do te fillojnë në datat 13 dhe 14 shkurt 2021. Dhe pasi ishte lënë disa ditë kohë, organizmi që qeveris rrjetën në vend ka zyrtarizuar edhe kalendarët e të 6 niveleve të Kampionatit Kombëtar.
Siç dihet, ky do të jetë një sezoni i ngjeshur, që nis në mes të shkurtit, duhet të mbyllet brenda 10-ditëshit të dytë të prillit, për të rriturit, ndërsa për moshat vazhdon deri në maj. Kështu, tek meshkujt, grupi A do të ketë 5 skuadra, ndërsa grupi B do të ketë 4 skuadra, që do të ndeshen me njëra-tjetrën me sistem vajtje-ardhje dhe dy të parat e renditjes së çdo grupi do të shkojnë më pas në gjysmëfinale, që do të zhvillohen me 3 takime, ndërsa finalja do të luhet me 5 takime.
E njëjta formulë do të zbatohet edhe tek femrat, ku të dy grupet do të kenë nga 6 skuadra. Ndërkaq, Kupa e Shqipërisë, si për meshkuj, ashtu edhe për femra, do të luhet duke u mbështetur mbi bazën e renditjes së fazës së parë të kampionatit, me dy të parat e çdo grupi që ndeshen me njëra-tjetrën të kryqëzuar në gjysmëfinale më 10 mars, ndërsa finalja luhet më 14 mars.
Ndërkohë, Federata Shqiptare e Volejbollit ka sqaruar edhe formulën, por edhe ka zyrtarizuar kalendarët për kampionatet e tjera të moshave, përkatësisht atë të grupmoshës së Nën-21-vjeçarëve dhe Nën-19-vjeçarëve për meshkuj dhe të grupmoshës së Nën-20-vjeçareve dhe Nën-18-vjeçarëve për femra, por edhe formulën e Kupës “Rinia” që është ekuivalente e Kupës së Shqipërisë për këto grupmosha.
Volejboll, FSHV zyrtarizon kalendarët e kampionateve, gjithçka gati për nisjen në fundjavë
