Teuta-Skënderbeu, të premten dhe Vllaznia-Apolonia, të shtunën, dy takimet e ndikuara. Ndryshimi i orarit të ri për lëvizjen e qytetarëve në kuadër të masave për mbrojtjen nga virusi “Covid-19”, ka bërë që të ndryshojë edhe orari i atyre ndeshjeve të futbollit që ishin planifikuar në mbrëmje.
Kështu, Federata Shqiptare e Futbollit është detyruar të ndryshojë kalendarin për ndeshjet e javës së 19-të të Kategorisë Superiore dhe, duke patur parasysh se nuk do të lejohet qarkullimi gjatë orarit 20:00-06:00 për periudhën 11 shkurt -25 shkurt, ndeshjet do të kenë orare të reja.
Gjithçka nis me takimin e së premtes, Teuta-Skënderbeu, e cila ishte planifikuar të luhej duke nisur nga ora 18:00, po është zhvendosur dhe do të luhet dy orë më herët, në ora 16:00. Ndërkohë, të gjitha sfidat e ditës së shtunë Tirana-Kukësi, Vllaznia-Apolonia, Bylis-Laçi dhe Kastrioti-Partizani do të luhen të gjitha në orën 14:00.
Tri prej këtyre takimeve nuk kanë ndryshim në kalendar, teksa ishin planifikuar më herët të luheshin duke nisur nga ora 14:00, ndërsa takimi që ndryshon orar është ai që do të luhet në Stadiumin “Loro Boriçi” të Shkodrës, midis Vllaznisë dhe Apolonisë. Ky takim ishte planifikuar fillimisht të luhej duke nisur nga ora 17:00.
Mbetet për t’u parë sesi do të ndryshojnë kalendarët e javëve në vijim të futbollit shqiptar për shkak të masave për përballimin e epidemisë së virusit korona.
Kategoria Superiore
Java e 19-të
Të premten, 12 shkurt 2021:
Teuta – Skënderbeu (16:00)
Të enjten, 13 shkurt 2021:
Tirana – Kukësi (14:00)
Vllaznia – Apolonia (14:00)
Bylis – Laçi (14:00)
Kastrioti – Partizani (14:00)
