Kardiologu i njohur i QSUT Edvin Prifti, është emri i cili doli nga hetimet e sotme të SPAK që çuan në arrestimin e gjyqtares Enkelejda Hoxha.
Kardiokirurgu i njohur akuzohet nga SPAK për “korrupsion pasiv i funksionarit publik” pasi në kohën që bëheshin përgjime për dosjen ndaj Enkelejda Hoxhës, kanë dalë të tjera fakte dhe prova për një çështje tjetër korrupsioni, që nuk ka lidhje me arrestimin e gjyqtares.
Bashkë me kardiokirurgun është akuzuar edhe infermierja Trendafile Frangu kurse personi i tretë i ndaluar është Migena Skënderaj po ashtu infermiere në QSUT. Të gjithë personat kanë dalë në dosje, pasi është operuar mamaja e njërës nga funksionaret e gjykatës së Krujës Manuela Mallkuçi, e cila ishte nën përgjim për lirimin e Saimir Petanit. Dhe pikërisht aty ka dalë gjithë historia e korrupsionit edhe në radhët e mjekëve. Ajo ka komunikuar me mjekun Prifti dhe i ka dhënë atij para për një operacion jashtë radhe që ai do ti kryente nënës së saj në QSUT.
Kësisoj, është pezulluar nga detyra nën akuzën e korrupsionit pasiv mjeku i njohur Edvin Prifti dhe infermierja Trendafile Frangu, të dy punonjës në QSUT, në shërbimin e kardiologjisë.
