Me Fenty-n, Rihanna ishte gruaja e parë që krijoi një markë origjinale në LVMH, mes atyre si Dior, Givenchy, Celine dhe Fendi. Më pak se dy vjet pasi Fenty filloi të shiste veshjet dhe takat e larta, LVMH dhe Rihanna tërhiqen.
A është ky fundi i eksperimentit të të famshmëve-dizajnesues që tentojnë të hyjnë në modën e lartë? Shkruhet se po, pasi ekziston diçka që as Rihanna nuk mund ta bëjë: të shesë rroba luksoze gjatë një pandemie.
LVMH, gjigandi francez i modës, shpalli shtëpinë e modës ‘Fenty’ me bujë në vitin 2019. Por këtë javë deklaroi se, “bashkë me Rihanna-n morën vendimin për të mbajtur në pritje aktivitetin e veshjeve, me qendër në Evropë, duke shpresuar për kushte më të favorshme”.
Troç do të thotë se, marka luksoze e veshjeve Fenty nuk do të prodhojë më koleksione veshjeje, edhe pse nuk është mbyllur zyrtarisht, dhe Rihanna mbetet pjesë e LVMH. Bashkëpunimi aktualisht vazhdon për linjën e të brendshmeve ‘Savage x Fenty’ dhe për linjën e kozmetikës ‘Fenty Beauty’.
Tani diskutimet janë duke u zhvilluar me punonjësit e markës për të ardhmen e tyre. Edhe pse bëhet fjalë për një raund të suksesshëm prej 115 milionë dollarë për mbledhjen e fondeve për Savage x Fenty, pezullimi i Fenty-t për veshje është një dështim i rrallë për grupin më të madh të modës luksoze, që gjithashtu zotëron Louis Vuitton, Dior dhe Celine.
Është gjithashtu një reflektim i reagimit të tregut ndaj koleksioneve Fenty, si dhe ndikimit më të gjerë të vazhdueshëm të pandemisë në sektorin e luksit. Dhe është një kujtesë se vetëm se dikush është shumë i ndjekur dhe i famshëm, nuk do të thotë se do të bëjnë rroba të shkëlqyera, origjinale.
