Edi Rama ishte mbrëmjen e sotme në kantierin ku po ndërtohet Lungomare 2 në qytetin bregdetar të Vlorës.
Gjatë një interviste që dha për gazetarin e kanalit të tij, ERTV, kryeministri u shpreh se Lungomare 2 do të jetë një nga shëtitoret më të mëdha, ndërsa tregoi edhe ambicien e tij që do të lërë gjurmë në historinë e qytetit të Vlorës.
Rama foli edhe për fëmijërinë dhe kujtimet që ka nga Vlora, ndërsa theksoi se kur djali i tij Zaho të rritet, dhe kryeministri të mos jetë më, të ketë një kujtim nga i ati në këtë qytet.
“Ndoshta ç’ka unë kam jetuar me Vlorën që i vogël më ka bërë më të ndjeshëm karshi bukurisë dhe potencialit. Nuk është cështje e kujtimeve të mia apo marrëdhënieve, por Vlora është e krijuar për të qenë një nga organet më vitale të organizimit të atdheut tonë, motor zhvillimi ekonomik.
Më kujtohet kur isha i vogël dhe vinim në Vlorë me atë linjën tren deri në Fier, pastaj autobus Fier-Vlorë, dhe pastaj stacioni ka qenë në anën tjetër ku ka qenë i ndjeri hotel Adriatiku, ishte nga ndërtesat më të bukura të Vlorës dhe pastaj bënim rrugën e bulevardit dhe më kujtohet shprehja e sime mëje, “palmat e Kristo Papajanit” që mbodhi palmat dhe i mbeti emri.
Në këtë aspekt besoj me Vlorën, se edhe deri këtu e kam lënë emrin për Zahon kur të vijë dhe të jetë në një moshë që mbase unë nuk do të jem më, por përtej emrit, kujtimi i mirë është një nga motivet bazë, shumë i rëndësishëm për mua” tha ai.
