Ora policore 20:00 e mbrëmjes me 6 e mëngjesit si masë antiCOVID skadon ditën e sotme. Pritet që Komiteti Teknik i Ekpertëve të mblidhet për të vendosur masat e reja që do të vihen në zbatim prej 26 shkurtit.
Prej 10 shkurtit Komiteti Teknik shtrëngoi masat dhe kufizoi lëvizjen prej orës 22:00 duke spostuar orën policore në 20:00 të mbrëmjes, kur do të mbylleshin lokalet, baret, restorantet, marketet dhe çdo shërbim tjetër, masë kjo e vlefshme deri në 26 shkurt.
Po ashtu vijojnë të jenë të anuluara fluturimet drejt Britanisë së Madhe, ndërsa në pikat kalimit kufitar tokësor të Kakavijës dhe Kapshticës ndalohet kalimi prej orës 20:00 deri në 6 të mëngjesit.
Përtej orës policore qytetarët mund të lëvizim vetem me një leje të marrë pas aplikimit në e-Albania. Kujtojmë po ashtu se shkollat e mesme në 10 qytetet e riskut zhvillojnë mësim online për të cilat sot Komiteti pritet të ketë një tjetër vendim. Nga ana tjetër vetë mjekët dhe ekspertët kanë kërkuar publikisht në media vendosjen e fashës orare të kufizimit të lëvizjes në 18:00 të mbrëmjes.
Ndërkohë në 24 orët e fundit ka vijuar të shënohet një numër shumë i lartë i të vdekurve nga COVID në vendin tonë. 1021 persona kanë rezultuar të infektuar dhe 19 pacientë kanë humbur jetën.
