Shoqërohen në Drejtorinë Vendore të Policisë së Tiranës 9 kontrollorë, që ishin pjesë e grevës në aeroportin e Rinasit. ‘Balkanweb’ raporton se kontrollorët u shoqëruan pak para mesnate, rreth orës 23:28.
Kontrollorët e Albcontrol hynë në grevë për shkak të stresit që ndjenin në punë pas uljes së rrogave të tyre, për shkak të krizës së pandemisë. Po ashtu, Prokuroria ka nisur hetimet për rastin në fjalë, për veprën penale ‘shpërdorim detyre’.
“Prokuroria e Rrethit Gjyqësor, Tirane ka filluar hetimet për situatën e ndodhur në aeroportin e Rinasit. Vepra penale për të cilën po hetohet lidhet me shpërdorim detyre, parashikuar nga Neni 248 i Kodit Penal.
Nga ana e oficerëve të policisë gjyqësore, po kryhen veprimet e duhura hetimore për zbardhjen e rrethanave te ngjarjes se ndodhur. Po vijojnë veprimet hetimore në drejtim të evidentimit të rolit të secilit prej personave të përfshirë në këtë ngjarje.”, thuhet në njoftimin e Prokurorisë.
Me grevën e 65 kontrollorëve të Albcontrol është pezulluar puna në Rinas, duke ndërprerë kështu fluturimet hyrëse dhe dalëse nga i vetmi aeroport ndërkombëtar që ka vendi ynë.
