Një ngjarje e rëndë ka ndodhur në Kashar, ku një gazetare ka rënë pre e dhunës fizike dhe psikologjike nga ish i dashuri i saj, i cili e ka marrë forcërisht në makinën e tij dhe e ka goditur.
Gazetarja, nënë e një fëmije, teksa ka bërë kallëzim ka treguar se që nga muaji janar i 2021, dhuna ndaj saj nga ish-partneri ka qenë e vazhdueshme.
40-vjeçarja ka rrëfyer para efektivëve se ish- i dashuri, ka shkuar poshtë shtëpisë së saj në mëngjes me një makinë “Toyota Corilla”, dhe më pas e ka ndjekur. Ai i ka kërkuar që të qendrojë me të, ndërkohë që ajo nuk ka pranuar, dhe ka vazhduar rrugën derisa ka mbërritur në vendin e saj të punës.
Më tej ajo rrëfen se ai e ka pritur në ambientet e jashtme të punës dhe në momentin kur ka dalë nga zyrat, e ka kapur për krahu duke detyruar me anë të presionit dhe kërcënimeve që të futej në makinë. Kjo e fundit ka kërkuar që ai ta linte të qetë.
Gazetarja më tej treguar se ish-partneri e ka marrë zvarrë duke e hipur në makinë dhe në një moment i ka futur edhe duart në fyt. Në këtë moment gazetarja i ka kërkuar banorëve të zonës ndihmë, por ai e ka goditur sërish dhe e ka kërcënuar me jetën e fëmijës së saj.
Teksa kanë qenë në një makinë, gazetarja ka vënë re një makinë policie dhe aty ka manovruar, duke e kapur vetë timonin. Ajo ka treguar se pasi e arrestuan, policia i ka këshilluar që të bënë denoncim në komisariat, ndërkohë që ka pranuar se edhe më herët 35-vjeçari e ka dhunuar.
