Të ftuara në “Ka një mesazh për ty” tek E Diela Shqiptare sot ishin disa vajza të cilat kanë surprizuar shoqen e tyre Olgerta. Olgerta ka humbur dy njerëz shumë të dashur të familjes nga Covid-19, gjyshen dhe xhaxhin dhe që nga ai moment ajo nuk ka shkuar më në shkollë.
Nëna e Olgertës tregoi se problemi fizik i të bijës nuk e ka penguar të shijojë jetën dhe të ndihet njeri normal si të gjithë. Dikur ka qenë shumë aktive në rrjetet sociale, i pëlqente të bënte foto, të dëgjonte muzikë, por tani pas vdekjes se gjyshes dhe xhaxhit, Olgerta ka hequr dorë pavarësisht përpjekjeve të familjes për ta mbajtur afër. Madje ajo edhe kur fle gjumë, vesh trikon e gjyshes dhe gjithë kohës shikon lot në sytë e saj dhe pesimizëm. Nëna i kërkoi Olës që ta dojë jetën ashtu siç ajo dëshiron dhe të dalë me të dhe motrën.
Ndërsa Ardit Gjebrea i kërkoi Olës që ajo të mos veshë më rroba të zeza dhe t’i premtojë që të mos e veshë më trikon e gjyshes, por ta vendosë në një vend. Këtu Ola u ndje në siklet dhe nuk pranoi për një moment, moderatori i ulet në gjunjë dhe vajza nuk mund ta refuzonte dot duke i premtuar se nuk do e vishte më.
