Fatbardh Kadilli ka zbuluar një detaj shumë interesant nga mbledhja dhe debatet brenda kryesisë së PD-së të ditës së dielë.
I ftuar në emisonin “Dekalog” të gazetarit Roland Qafoku në RTSH 24, Kadilli tha se në mbledhje kishte edhe nga ata apo ato që ai i quajti Nafije, personazhi që tund dybekun në filmin “Gjuetia e fundit”. “Ishin disa në mbledhje që jo vetëm nuk bënin si përgjegjës në humbje Bashën, por arritën deri aty sa thanë po unë çfarë bëra për këtë humbje”, tha Kadilli. “Ishin komplet Nafije”, shtoi ai me ironi. Kadilli tregoi se në përgjithësi mbledhja shkoi në kufijtë normalë edhe pse pati debate.
“Unë madje iu drejtova me fjalë shumë politese Lulzim Bashës. Disa herë ia kam përsëritur në sy se ai nuk është njeri i keq por nuk është për atë punë. Duhet të largohet si përgjegjësi kryesor i humbjes së PD” tha Kadilli.
Megjithatë sipas tij, të turpshme ishin ato diskutime që jo vetëm Bashën nuk e bënin fajtor por si Nafije komplet thoshin po unë ç’bëra që PD të mos humbasë. Këto sipas tij janë të papranueshme në Partinë Demokratike të vitit 2021.
