Komisioni i Ankesave dhe Sanksioneve ka vendosur që të hedhë poshtë kërkesën e PD dhe LSI për përsëritje zgjedhjesh në qarkun e Vlorës.
PD dhe LSI kërkojnë përsëritje zgjedhjesh, pasi sipas tyre fitorja e PS-së në 25 prill u realizua vetëm prej manipulimit e shitje-blerjes së votës.
Anëtari i KAS, Ilir Rusmajli dhe përfaqësuesi ligjor i PD-së, Marash Logu janë përfshirë në një debat për votimin e shumëfishtë të pretenduar nga ana e PD-së.
Logu shprehet se 19 persona kanë votuar nga 3 herë, ndërsa anëtari i KAS tha se nuk kanë asnjë provë për këtë.
Logu: Në qarkun e Vlorës rezulton që 23 persona të kenë votuar 60 herë ose 3 herë secili. Dua ta jap tani përgjigjen.
Rusmajli: Jo s’do e japësh tani.
Logu: Dua ta jap tani jo më vonë.
Rusmaji: Mos na krijo incidente kot.
Logu: Zoti Rusmaili ju ishit dje, as ti as unë nuk jemi eksperte të teknologjisë, unë e pyeta nënkomisioneren që a ekziston që një person të ketë 19 karta identiteti të paraqitet të bëjë leximin e të votojë 19 herë, përgjigja e nënkomisioneres ishte po ekziston mundësia.
Rusmajli: Prova nuk e provon se ka ndodhur ky skenar, se po të ndodhte juve do të ishit më i lumturi në botë.
Rusmajli: Fikja pak mikrofonin. Juve keni ardhur në këtë institucion për të kërkuar drejtësi, është thjesht tymnajë e krijuar për të prishur seancën.
Sipas PD-së, nga kryqëzimi i të dhënave të pajisjeve të identifikimit elektronik (PEI) për qarkun Vlorë, e cila u mor nga KAS me kërkesë të Partisë Demokratike, rezultoi:
“Shenjat e gishtërinjve të 23 personave janë përdorur për identifikimin e 60 zgjedhësve. Kjo do të thotë se ekziston mundësia që 23 persona të kenë votuar 60 herë, ose rreth 3 herë/secili. Në foton e parë me nr.rendor 7 rezulton se e njëjta shenjë gishti është përdorur për identifikimin e dy zgjedhësve në dy qarqe të ndryshme: njëri në bashkinë Vlorë dhe tjetri në bashkinë Ura Vajgurore, Berat. Në foton e dytë me nr.rendor 19 rezulton se i njëjti person ka votuar dy herë, një herë në bashkinë Konispol, dhe herën tjetër në bashkinë Sarandë. Po në këtë foto me nr.rendor 21, rezulton se e njëjta shenjë gishti është përdorur për identifikimin e 12 zgjedhësve, pra potencialisht i njëjti person ka votuar 12 herë.
Vetëm katër prova që KAS ka qenë i detyruar t’i marrë, me kërkesë të PD-së, faktojnë rreth 200 shkelje flagrante të ligjit. Ndërsa, shërbëtorët e Edi Ramës në KAS kanë refuzuar jo një herë, por 57 herë, të bëjnë transparencë të plotë mbi masakrën zgjedhore të 25 prillit.
Këto prova janë dëshmi e pakundërshtueshme se vullneti i 1.78 milionë votuesve u diktua nga krimi dhe paligjshmëria. Megjithatë, ne do ta vazhdojmë betejën. Sepse këtë betejë nuk po e bëjmë as për vete, as për anëtarët e KAS, por për qytetarët shqiptarë, të cilët janë viktimat e vërteta e 25 prillit“, sipas PD-së.
