Luçiano Boçi ka marrë në mbrojtje ish-kryeministrin Sali Berisha, pasi SHBA e shpalli “non grata” bashkë me familjen e tij, për “korrupsion madhor”.
Deputeti i zgjedhur i PD, përmes një postimi në Facebook, i ka thurur elozhe ish-liderit të PD, duke e krahasur me Jezu Krishtin.
Sipas Boçit, shpallja “non grata” e çon Sali Berishën drejt përjetësisë, edhe pse futja në në listën e zezë amerikane e ka zbritur në pikën më të ulët të karrierës së tij.
Deputeti i PD e krahason SHBA me Perandorinë Romake që kryqëzoi Krishtin dhe të gjitha ata që po festojnë shpalljen “non grata” të Berishës, i krahason me farisenjtë e Izraelit të kohës.
“Dhe Krishtit i ngarkuan kryqin më të rëndë drejt Golgotës, pa e ditur se po e ngrinin drejt përjetësisë. Ata që e dënuan ishin mëkëmbës të Perandorisë së kohës.
Ata folën po ashtu në emër të ligjit dhe bashkëpunuan me farisenjtë vendas. Ata që fituan përkohësisht dhe fërkuan duart për momentin ishin farisenjtë.”, shkruan Luçiano Boçi.
Por ndërsa besimi i krishterë na meson se Krishti, që ishte i pa faj, vdiq në kryq për mëkatet e botës, Sali Berisha po “kryqëzohet” për “mëkatet” që bëri në kurriz të shqiptarëve./GSH
