Gjykata e Apelit në Shkodër ka lënë në fuqi masën e sigurisë “Arrest me burg” për pesë të akuzuarit për përdhunimin e një 15-vjeçareje në fshatin Tarazh të Mirditës. Ngjarja u denoncua në muajin maj të këtij viti, ndërsa Artan Kaçorri, Albert Molla, Ermal Tarazhi, Nikë Lleshi dhe 17-vjeçari A. Gj., kanë kërkuar në apel lirimin nga burgu.
Mirëpo, kërkesa e tyre nuk është pranuar nga Apeli. Prokuroria mësohet se është në pritje të përgjigjes së ekspertizës mjekësore, e cila do të vërtetojë nëse 5 të akuzuarit kanë abuzuar apo jo seksualisht me të miturën, pasi ata e kanë mohuar diçka të tillë.
Artan Kaçorri, Albert Molla, Ermal Tarazhi, Nikë Lleshi dhe shtetasi me iniciale A. Gj., u arrestuan nga policia, pas denoncimit të 15-vjeçares, e cila pretendon se përmes shantazhit është përdhunuar nga 5 personat. Referuar dëshmisë së vajzës, rezulton se personi i parë që ka abuzuar me të miturën është 32-vjeçari Artan Kaçorri. Ky i fundit kishte patur lidhje me 15-vjeçaren dhe në muajin mars madje i kishte blerë dhe një telefon për të komunikuar me të.
Kaçorri kishte arritur që të mashtronte të miturën e ta merrte në makinë e më pas ka abuzuar seksualisht me të, duke i bërë dhe video e foto intime të cilat janë shpërndarë dhe tek 4 personat e tjerë, të afërm me njëri-tjetrin. Përmes videove dhe fotove, 5 personat kanë arritur ta shantazhojnë të miturën dhe ta detyrojnë atë që të kryejë marrëdhënie seksuale me ta në mënyrë të përsëritur./MCN
