Drejtuesit politik të PD-së në zgjedhjet e 25 prillit si “shkaktarë” të humbjes kanë bërë aleatët brenda PD-së dhe LSI-në, që sipas tyre “dogji” mijëra vota. Gjithashtu i kanë deklaruar Bashës se në disa qarqe të vendit PS përdori personat me rekorde kriminale të cilët kërcënuan familjet në nevojë apo disa të tjerë për vende pune.
Ditë e djeshme të besuarit e Lulzim Bashës i kanë dorëzuar raportin sekretarit të përgjithshëm të PD-së, Gazment Bardhi. Bëhet fjalë për analizën e rezultatit të zgjedhjeve të 25 prillit. Ata në raportin e tyre kanë arsyetuar disa faktorë që çuan në humbjen e radhës së PD-së, në zgjedhjet e përgjithshme kundër Edi Ramës dhe PS-së. Sipas tyre administrata publike ka qenë e gjitha në angazhim të pushtetit, patronazhistët po ashtu. Po ashtu drejtuesit politikë të PD-së kanë arsyetuar se u dhanë shumë certifikata legalizimesh në këmbim të votave. Ata i kanë deklaruar Bashës se në disa qarqe të vendit u përdorën personat me rekorde kriminale të cilët kërcënuan familjet në nevojë apo disa të tjerë për vende pune. “Edhe fondet e tërmetit janë përdorur dy muajt e fundit para 25 prillit”, thuhet në një nga raportet e paraqitura në selinë blu. Disa drejtues politikë të PD-së janë shprehur të pakënaqur dhe me kryetarët e partive aleate, duke thënë se “ata nuk dolën në terren për të kërkuar masivisht vota për listën e Partisë Demokratike, teksa një pjesë e tyre nuk e rakorduan aktivitetin politik me drejtuesit e PD”. Kritika të forta ka pasur edhe për LSI-në. Disa drejtues kanë theksuar se refuzimi i LSI për të dalë me një listë të përbashkët me PD “dogji” mijëra vota dhe pamundësoi marrjen e shumë mandateve. Analiza për të 12 qarqet do të merret në shqyrtim në mbledhjen e kryesisë së PD që pritet të zhvillohet këtë të shtunë.
Skema
Kujtojmë që Partia Demokratike së bashku me aleatët e saj të vegjël hyri në këto zgjedhje pa asnjë pushtet, pasi dogji mandatet në vitin 2019 dhe pak muaj më vonë po të atij viti bojkotoi zgjedhjet lokale. Në pikën e dytë të analizës demokratët duhet të përmendin çdo emër të personave që pretendojnë se kanë ndikuar në mënyra të jashtëligjshme në mënyrën se si do të votonin qytetarët. Në këtë mënyrë, ata që pretendojnë se në qarkun e tyre është kryer masakër elektorale, do duhet ta vërtetojnë atë me detaje duke përmendur emrin e gjithsecilit që ka ndikuar, por edhe duke e faktuar pretendimin e tyre. Nëse nuk arrihet një analizë e tillë, nuk përjashtohet mundësia e ndryshimeve në struktura, pasi edhe në udhëzim parashikohej që nëse nevojitet, do të ketë zgjedhje në struktura pas analizës. Drejtuesit politikë dhe ekipi i gjithsecilit do duhet të analizojë edhe ndikimin që ka pasur kandidati i çdo partie tjetër nga subjektet e tjera politike apo si të pavarur.
