Dy ekspertët e njohur të ekonomisë, profesorët dhe drejtuesit e Universitetit Mesdhetar të Shqipërisë, Akademik Prof.Dr, Anastas Angjeli dhe Prof. Dr Adrian Civici, promovuan sot librin “Përballë Krizës – Sfidat e teorisë dhe politikave ekonomike”.
Mes personaliteteve të njohur të fushës ekonomike, politike dhe shkencave sociale në panel ishin të ftuar , Kryetari i Akademisë së Shkencave, Skënder Gjinushi, Ministrja e Financave dhe Ekonomisë, Anila Denaj, Guvernatori i Bankës së Shqipërisë, Genc Sejko. Ky libër vjen si një analizë më e thellë dhe e detajuar sa i përket e zhvillimeve, ndikimeve implikimeve, problemeve, e pasojave që kriza e koronavirusit krijoi. Dy ekspërtët e ekonomisë, kanë depërtuar në “zemër të mekanizmave të kësaj krize”, shumedimensionale, humane e shendetesore, ekonomike e sociale, financiare dhe teknologjike. Ata kanë analizuar gjithashtu mendimin ekonomik shkencor, shkollat e këtij mendimi, por dhe të një ndryshimi të madh praktik dhe pasojat.
“Jemi përpjekur, të ofrojmë, në formën e informimit, analizave, komenteve, përshkrimeve, dhe pse jo, dhe të rekomandimeve, atë që ka ndodhur me këtë krizë , si dhe, me çfarë skenaresh e periudhe kohore pritet të dilet prej saj”, u shpreh themeluesi i Universitetit Mesdhetar të Shqipërisë, Anastas Angjeli.
Bashkëautori, Adrian Civici u shpreh se kriza e koronavirusit ishte një krizë ndryshe pasi erdhi jashtë ekonomisë dhe financave, por me pasoja të forta në to, prandaj dhe sfidat që sjell me vete janë të përmasave të reja. “Sfidat që kemi përpara janë të mëdha dhe ne me modesti jemi përpjekur t’i japim përgjigje shumë pyetjeve që ngrihen për të ardhmen, jo vetëm në fushën ekonomike dhe financiare por në të gjitha fushat e tjera të implikuara”, tha Civici.
Ministrja e Financave dhe ekonomisë Anila Denaj theksoi se e ardhmja është e vështirë të parashikohet, por çdo krizë sjell me vete edhe oportunitete.
”Duke kuptuar se sa e vështirë ishte kjo krizë për bizneset ne duhet të bëjmë të mundur të orientojmë pikërisht në ato fusha ende të pashfrytezuara plotësisht ku egzistojnë këto oportunitete. Ky ishte një mësim i mirë që morëm nga kjo krizë globale”, u shpreh Ministrja.
Libri u vlerësua edhe nga të pranishmit e tjerë në panel. Ky libër vjen vetëm një vit pas publikimit të librit “Kriza ekonomike – në periudhën e koronavirusit”. Dy autorët nënvizuan se libri pasues nuk ishte thjesht nje dëshirë por ishte dhe një detyrim ndaj lexuesve për shkak se, kur u shkruajt dhe u publikua pjesa e parë e këtij libri, pandemia dhe kriza ekonomike rrjedhoje e kësaj pandemie, ishte vetëm në fillesat e veta.
