Ministri i Mbrojtjes, Niko Peleshi ka reaguar lidhur me situatën problematike të krijuar gjatë ditëve të fundit nga zjarret në vend.
Ministri i Mbrojtjes thotë se zonat me situata serioze të zjarrit janë vënë tanimë nën kontroll, por shton se sfidë për autoritetet mbetet aktualisht Karaburuni.
“Gjatë natës dhe orëve të para të mëngjesit janë vënë në kontroll ose neutralizuar pothuaj të gjitha situatat serioze të zjarrit, sfidë vazhdon të ngelet Karaburuni, ku është përqendruar edhe puna më e madhe e Forcave të Armatosura. Falënderoj të gjithë efektivët e Forcave të Armatosura dhe strukturave të tjera të mbrojtjes civile për angazhimin dhe sakrificën e treguar në këto ditë të nxehta, na bëni të gjithëve krenarë”, shkruan Peleshi në rrjetet sociale.
Më herët sot një helikopter i Forcave të Armatosura mbërriti në Karaburun për të luftuar flakët që janë ende aktive.
