Prej një javë në disa zona të vendit janë shtuar vatrat e zjarrit, ku situata mjaft problematike regjistrohet në zonën e Karaburunit në Vlorë, duke rrezikuar edhe bazën ushtarake. Ministri i Mbrojtjes Niko Peleshe tha dje se gjendja është nën kontroll, ndërsa bëri thirrje për kujdes nga ana e qytetarëve.
Zjarret e shkaktuara nga temperaturat e larta përgjatë gjithë territorit të Shqipërisë janë vënë nën kontroll në një pjesë të saj ditën e djeshme, por situate mbetet kritike në disa pjesë të vendit, përfshirë përreth bazës ushtarake në Karaburun. Ministri i Mbrojtjes, Niko Peleshi, tha se shuarja e zjarreve ishte e suksesshme dhe se shumica e vatrave janë stabilizuar, por paralajmëroi që përkundër përpjekjeve të deritashme të 200 forcave të armatosura të zbarkuara për të shuar zjarret por zona përreth Bazës detare të Pashalimanit vazhdon të jetë e rrezikuar. “E vetmja vatër aktive serioze në vend është Karaburuni ku kemi përqëndruar dhe do të vazhdojmë të jemi të përqëndruar me mjete ajrore dhe mjete tokësore dhe me forca të shumta”, tha Peleshi. Ministri tha se është arritur të shmanget përfshirja nga flakët e zonës ushtarake të Pashalimanit, që gjendet në jug të Vlorës dhe po ashtu edhe Parku Kombëtar i Llogarasë është duke u menaxhuar. “Më afër kërcënimeve të zjarreve kanë qenë banesat në zonën e Ksamilit dhe një fshati të Përmetit, por tani ato janë shuar. Në orët e para të mëngjesit është fikur edhe zjarri në Mamuras”, bëri të ditur Peleshi. Ndërkohë, temperaturat e larta dhe erërat që fryjnë e bëjnë të paparashikueshme situatën me zjarre, teksa vazhdon të raportohet për vatra të reja nëpër gjithë Shqipërinë. Deri sot nuk janë rrezikuar vendbanimet, megjithatë, përmes një buletini për rreziqet natyrore të publikuar nga Instituti i Gjeoshkencave, Energjisë, Ujit dhe Mjedisit thuhet se gjatë kësaj jave “pritet nivel ‘i lartë’ rreziku në pjesën më të madhe të qarqeve”. Sipas institutit, qarqet me rrezik më të lartë janë qarqet e Shkodrës, Kukësit, Fierit, Vlorës dhe Gjirokastrës, ndërkohë që Dibra dhe Durrësi janë vënë në kategorinë e moderuar. Ndërkohë edhe kryeministri Edi Rama reagoi dje për situatën e krijuar nga zjarret në vend, për shkak të temperaturave të larta. Rama publikon video të Forcave të Ushtrisë dhe trupave Rangers, që janë angazhuar me helikopterë për shuarjen e flakëve, ndërsa thekson se puna e tyre në terren meriton respekt e inkurajim. “Angazhimi disaditor për shuarjen e zjarreve në Karaburun e jo vetëm, nga Forcat e Ushtrisë dhe trupat Rangers në terren meriton respekt e inkurajim, në një kohë kur shumë vende po përballen me kërcënimin e zjarreve”, shkruan Rama.
