Pas Iliasit dhe Gjilekes, vjen radha e Vunoit dhe Dhërmiut në përfundimin e procesit të regjistrimit të pronave. Janë rreth 1700 prona në Vuno dhe rreth 800 prona në Dhërmi që e përfunduan këtë proces.
Drejtori i Përgjithshëm i Kadastrës Artan Lame së bashku me Kryetarin e Bashkisë Himarë Gjergji Goro kanë dorëzuar në mënyrë simbolike certifikatën e pare te pronësisë se banesës dhe të truallit qytetarit Odise Anagnosti, e cila u përfitua pas përfundimit të regjistrimit fillestar në Vuno. Qe prej sot banoret dhe pronaret e fshatit Vuno mund te aplikojnë për marrjen e certifikatës së pronësisë për shtëpitë dhe tokat e tyre.
Ndërkohë Lame dha lajmin tjetër edhe për Dhërmiun, ku u bë shpallja e rezultatit dhe afishimi publik për rreth 800 prona te këtij fshati. Banoret do të kenë afat 45 ditë të konsultojnë produktin e punës së Kadastrës, pas së cilës do të kryhet shpërndarja e certifikatave të pronësisë.
Lame ka kërkuar edhe me tej disponibilitetin e Bashkisë Himare për t’ju krijuar mundësi qytetarëve për çdo vërejtje që ata kanë në lidhje me punën e Kadastrës. Po ashtu drejtori i Kadastrës kërkoi që të gjithë qytetarët që kanë emrin në listë të aplikojnë për pajisje me certifikatë pronësie, si një dokument për të pasur pronën e sigurt nesër!
Më poshtë gjeni listën e qytetarëve që duhet të aplikojnë nga sistemi i e-Albania për të marrë dokumentin e pronësisë.Kujtojmë këtu që regjistrimi i pronave në zonën e fshatrave të Bregut po bëhet për herë të parë në histori, pasi nuk është trashëguar asnjë regjistrim as nga koha e mbretit Zog dhe as nga koha e regjimit komunist.
