Vijojnë përpjekjet për shuarjen e vatrave të jashtëzakonshme të zjarrit në Kaliforni, në atë që konsiderohet si zjarri i dytë më i madh në historinë e shtetit.
Zjarri tashmë ka shkatërruar pothuajse të gjithë qytetin historik të Gold Rush të Greenville dhe autoritetet paralajmërojnë se mund të duhen javë për t’u kontrolluar
Aktualisht në vend janë 11 vatra zjarri që kërcënojnë gati 14,000 banesa ndërkohë që tashmë janë djegur më shumë se 400 të tjera.
Tymi i dendur ka mbuluar pyjet piktoreske të Kalifornisë Veriore. Erërat nuk pritet të arrijnë shpejtësinë e ditëve të kaluara, por ato janë gjithsesi shqetësuese për zjarrfikësit që po punojnë në kushte të vështira për të mbrojtur mijëra shtëpi të kërcënuara nga flakët.
Valët e të nxehtit dhe thatësira si pasojë e ndryshimeve klimatike i kanë bërë zjarret më të vështira.
Punëtorët e ekipeve të shpëtimit po përgatiten për temperatura më të larta prej 38 gradë Celsius (100 F) në ditët në vijim, gjë që do vështirësojë ndjeshëm edhe procesin e shpëtimit.
Zjarri i ashtuquajtur Dixie filloi më 13 korrik dhe që atëherë ka shkatërruar më shumë se 463,000 hektarë tokë. Tre persona janë zhdukur dhe mijëra të tjerë janë evakuuar.
