Një 36-vjeçar shqiptar është aksidentuar për vdekje në Livorno të Italisë. Viktima është identifikuar si Gazment Bushi, ndërsa ngjarja e rëndë ndodhi mesnatën e kaluar, kur i riu shqiptar u përplas nga një makinë tip “Porsche”, teksa ishte duke kaluar rrugën për të blerë një shishe ujë.
Gazment Bushi kishte dalë për një darkë me miqtë e tij. Ai shoqërohej nga një mik kur po kalonte rrugën, teksa drejtuesi i mjetit tip “Porsche”, në gjendje të dehur e përplasi për vdekje duke e hedhur mbi 100 metra në asfalt.
Gazment Bushi punonte murator në Itali në firmën e vëllait të tij, Edil Bushi. Sipas mediave italiane, 36-vjeçari u transportua i gjallë në spital, por dëmtimi i rëndë në kokë ia bëri të pamundur mbijetesën. Ndërkohë, shoferi 33-vjeçar i cili e përplasi u arrestua nga Policia dhe rezultoi se ishte në gjendje të dehur.
