Bashkimi Evropian ka arritur qëllimin e tij të parë të vaksinimit masiv kundër Covid-19. 70 për qind e të rriturve ose ndryshe mbi 250 milion njerëz në Bashkimin Evropian kanë marrë të dyja dozat e vaksinës anti-covid.
Këtë shifër e ka bërë me dije vetë presidentja e Komisionit Evropian, Ursula Von der Leyen, duke theksuar se unioni ka arritur objektivin e vendosur në muajin janar.
“Shtatëdhjetë përqind e të rriturve në Bashkimin Evropian janë plotësisht të vaksinuar. Dhe kjo është më shumë se 250 milion njerëz,” tha von der Leyen në një deklaratë të shkurtër duke e konsideruar këtë si një “arritje të madhe”.
Ndërsa pavarësisht vaksinimeve, lufta globale kundër pandemisë së Covid-19 tani zhvillohet me variantin Delta dhe asgjë nuk ka përfunduar.
“Por pandemia nuk ka mbaruar dhe ne duhet të qëndrojmë vigjilent,” tha ajo, duke u bërë thirrje më shumë evropianëve që të vaksinohen shpejt për të “shmangur një valë të re infeksioni dhe shfaqjen e varianteve të reja”.
Fushata e vaksinimit e Bashkimit Evropian filloi në fund të vitit 2020 dhe qëllimi i Komisionit është të vaksinojë 70% të njerëzve mbi moshën 18 vjeç deri në fund të shtatorit.
Ndërkohë, një variant i ri i Covid është zbuluar në Afrikën e Jugut.
Të hënën Instituti Kombëtar për Sëmundjet ngjitëse në Afrikën e Jugut ka lëshuar një alarm për “prejardhjen e C.1.2”, duke thënë se është prezent në të gjitha provincat në vend, por ende nuk është listuar si një variant shqetësues nga OBSH-ja.
