Një varr masiv është zbuluar në Odessa, një qytet në jug të Ukrainës i cili daton nga periudha e regjimit të Jozef Stalinit.
Historianët pohojnë se disa qindra mijëra njerëz u vranë në Ukrainë gjatë atij regjimi, raporton bbc.
Midis pesë dhe tetë mijë mbetje të trupave njerëzorë u gjetën me objekte të ndryshme, dhe historianët besojnë se viktimat u ekzekutuan nga policia sovjetike në fund të viteve 1930.
Trupat u shpërndanë në një total prej 29 varresh dhe u zbuluan gjatë një ekzaminimi të tokës para zgjerimit të territorit të aeroportit.
Drejtori i degës rajonale të Institutit Memorial të Ukrainës, Sergiy Gutsalyuk, tha se identifikimi i viktimave aktualisht nuk është i mundur, sepse të gjitha dokumentet dhe të dhënat zyrtare të mundshme janë në Rusi.
Agjencia kombëtare ukrainase e lajmeve Ukrinform shkruan se në Odessa midis viteve 1938 dhe 1941, policia sekrete sovjetike dënoi me vdekje rreth 8.600 njerëz.
Edhe pse i madh, ky varr masiv nuk mund të krahasohet me varrin më të madh të gjetur ndonjëherë në fshatin e pyllëzuar të Bikivnia, pranë kryeqytetit Kiev. Gjatë sundimit të Stalinit, rreth 200 mijë njerëz u ekzekutuan atje.
