Analisti Lorenc Vangjeli ka thënë para dy vitesh në emisionin “Opinion” se janë 4-5 oligarkë të cilët bëjnë çfarë është e mundur që gjithçka të jetë në vullnetin e tyre. Sipas tij, këto janë Edi Rama, Sali Berisha, Lulzim Basha, Ilir Meta, Monika Kryemadhi.
“Nëse në Shqipëri ndodh ndonjë mrekulli dhe e djathta dhe e majta ndërrojnë rolet, ne do t’i shikojmë duke folur ndryshe. E majta që do të akuzojë oligarkët e të djathtës e kështu me radhë. Biznesi më i madh sot në vend është pikërisht politika. 4 ose 5 oligarkë bëjnë edhe diellin edhe shiun në Tiranë”, është shprehur Vangjeli.
Analisti shprehet se politika është e përkohshme dhe politikanët ndërrojnë rolet por administrata duhet të jetë e përhershme.
“Lulzim Basha i ka harruar disa emra të cilët ai i përdori, i përmendi, i akuzoi, u tha të gjithë shqiptarëve t’i urrenin dhe sot ai beson se mendon ndryshe. Dhe tmerri e di ku është? Tek përkohësia. E përhershme është vetëm politika dhe kjo frymë sovjetike që kemi ne, te përkohësia e administratës. Secila nga këto kontrata zgjat 10 vjet. Politikanët ndërrojnë rolet, ndërrojnë xhaketat, ndërkohë që administrata që duhet të ishte e përhershme ka ndryshuar”, ka thënë Vangjeli para dy vitesh.
