Ministrja e Financave Delina Ibrahimaj u shpreh se vendi ka potencial për të përballuar krizën energjetike, nëse i përmbahet tregjeve ndërkombëtare. Gjithashtu u konfirmua se pavarësisht situatës së rëndë, pritet që të mos ketë rritje të çmimit të energjisë për abonentët familjarë dhe biznesin e vogël.
Ministrja e Financave dhe Ekonomisë, Delina Ibrahimaj, pas mbledhjes së qeverisë adresoi akuzat e Partisë Demokratike në lidhje me raportin e FMN-së. PD u shpreh dje nëpërmjet Jorida Tabakut se “FMN ka certifikuar se qeveria po dështon në menaxhimin dhe rritjen e të ardhurave në buxhet edhe si pasojë e informalitetit të lartë dhe keqmenaxhimit të taksave”. Ibrahimaj nënvizoi se treguesit e FMN, por dhe të Bankës së Shqipërisë, nuk e tregojnë këtë, ndërsa shtoi se ekonomia në vend është e qëndrueshme. “Në radhë të parë, unë do ju ftoja që ta lexonit me vëmendje deklaratën e FMN-së. Kemi pasur diskutime të të gjitha formave me përfaqësues të FMN-së dhe të Bankës së Shqipërisë. Ndajmë mendim të përbashkët se ekonomia shqiptare ka ardhur në përmirësim dhe ka treguar stabilitet. Ka potencial për të përballuar krizën energjetike nëse i përmbahet tregjeve ndërkombëtare. Nuk ka pasur rritje të normave të interesit. Banka e Shqipërisë deklaroi se nuk pret që të rrisë normat e interesit gjatë vitit. Ka pasur disa rritje të çmimeve. Inflacioni në muajin shtator ishte 2,5%. Në analizën e kryer nga FMN dhe nga Banka e Shqipërisë nuk ka sinjal për varfërimin e xhepave të shqiptarëve”, u shpreh Ibrahimaj.
Tabaku
Nënkryetarja e Partisë Demokratike, Jorida Tabaku, ka komentuar raportin e FMN-së për ekonominë e vendit. Sipas saj, FMN ka certifikuar se qeveria “po dështon në menaxhimin dhe rritjen e të ardhurave në buxhet edhe si pasojë e informalitetit të lartë dhe keqmenaxhimit të taksave”, ndërkohë që investimet janë joeficente dhe qytetarët e ekonomia nuk fitojnë prej tyre, as në terma rritjeje ekonomike dhe as në rritje të punësimit. Sipas Tabakut, në veçanti, më e rëndë situata paraqitet “me shqiptarët që do të paguajnë më shumë për të blerë më pak ushqime. 51% e të ardhurave të familjeve tona shkon për ushqim dhe energji elektrike, do na shkojë edhe më shtrenjtë!”. Sipas nënkryetares së PD-së, raporti evidentoi edhe mungesën e transparencës me kontratat“, që po krijojmë një klimë armiqësore me biznesin”.
