Një kategori e veçantë e Maratonës së Tiranës është ajo “We too”. Në këtë kategori marrin pjesë persona me nevoja të veçanta dhe paraplegjikë të cilët garuan për një mesazh motivues, se edhe ata munden.
Ndërkohë garues të veçantë në maratonë po ashtu kanë qenë edhe Hazizi dhe Fatima. Çifti i njohur nga Afganistani, të cilët u detyruan që ta braktisin vendin e tyre pas ardhjes në pushtet të talebanëve, janë të njohur për pjesëmarrjen në maratona të ndryshme duke iu bashkuar kauzave.
Kësaj here, kauza e tyre ishte për refugjatët dhe afganët të cilët në këto momente po kalojnë një situatë aspak të qetë.
Pak ditë më parë, Hazizi dhe Fatima u pritën në një takim nga kryetari i Bashkisë së Tiranës, Erion Veliaj, në zyrën e tij, i cili i përgëzoi dy të rinjtë për angazhimin në jetën publike e posaçërisht pjesëmarrjen e tyre, bashkë me qindra vrapues të tjerë të huaj në Maratonë.
