Vanessa Bryant, e veja e Kobe Bryant, tha se mësoi për vdekjen e burrit të saj duke parë njoftimet “RIP Kobe” në telefonin e saj.
Ylli i basketbollit Bryant vdiq me vajzën e tij, Gianna 13-vjeçare dhe shtatë të tjerë në aksidentin e janarit 2020. Zonja Bryant po padit policinë e Los Anxhelosit për neglizhencë dhe shkelje të privatësisë.
Ajo pretendon se oficerët shpërndanë foto të skenës së përplasjes, duke përfshirë trupat e Kobe dhe Gianna. Ajo ka deklaruar se fotot u shpërndanë “si të ishin imazhe të kafshëve në rrugë”.
Zonja Bryant tha se ajo u informua nga një ndihmës i familjes se burri dhe vajza e saj kishin qenë në një aksident me helikopter, por pesë persona kishin shpëtuar. Ajo mendoi se ata ishin me gjasë mes të mbijetuarve.
Por pastaj mesazhet filluan të shfaqen në telefonin e saj.
“Unë po e mbaja telefonin, sepse padyshim që po përpiqesha të telefonoja burrin tim dhe të gjitha këto njoftime filluan të shfaqen në telefonin tim, ku thuhej “RIP Kobe. RIP Kobe. RIP Kobe”, ka deklaruar ajo.
“Jeta ime nuk do të jetë kurrë e njëjtë pa burrin dhe vajzën time”, shtoi ajo.
