Drejtori i Përgjithshëm i Policisë së Shtetit, Gledis Nano, ka zhvilluar një vizitë në Kosovë, me homologun e tij atje, Samedin Mehmetin.
Lajmi është bërë i ditur nga ky i fundit përmes një postimi në rrjete sociale. Në fokus të këtij takimi ka qenë bashkëpunimi i të dyja institucioneve në shumë fusha.
Ky bashkëpunim sipas Mehmetit do të korrë sukses në të ardhmen në luftën ndaj kriminelëve dhe krimit të organizuar.
Postimi i plotë:
Drejtori i përgjithshëm i Policisë së Kosovës z. Samedin Mehmeti priti në takim drejtorin e përgjithshëm të Policisë së shtetit, z. Gledis Nano
Sot, më 29.10.2021, delegacioni nga Shqipëria në krye me drejtorin e përgjithshëm të Policisë së shtetit z. Gledis Nano, qëndruan për një vizitë zyrtare në drejtorinë e përgjithshme të Policisë Kosovës, ku u mirëpritën nga drejtori i përgjithshëm i PK-së, z. Samedin Mehmeti së bashku me drejtuesit më të lartë të Policisë.
Drejtori i Përgjithshëm z. Mehmeti, fillimisht u dëshiroi mirëseardhje përfaqësuesve nga Policia shqiptare dhe njëherit i uroi detyrën e re z. Nano si drejtori i përgjithshëm i Policisë së shtetit, të cilin e njoftoi se Policia e Kosovës e vlerëson lartë bashkëpunimin në mes të dy institucioneve në të gjitha fushat e sigurisë dhe jo vetëm.
Ky takimi ishte i karakterit njoftues, por u shfrytëzua mundësia e diskutimit edhe rreth temave me interes të përbashkët, si shkëmbimi i eksperiencave dhe përvojave të deritanishme si dhe avancimi i mëtejmë i bashkëpunimit dhe ndërveprimit në mes të dy policive të të dyja vendeve.
Palët u zotuan për vazhdim të bashkëpunimit të ndërsjellë në fushën e sigurisë, mbështetjen në fusha specifike në mes të dy institucioneve policore, që rezultojnë në bashkërendimin akoma më të mirë në luftën e përbashkët ndaj veprimtarive kriminale, krimit të organizuar dhe atij transkufitar.
