Uefa Champions League do të sjellë një mbrëmje emocionuese me përballje të forta dhe vendimtare për shumë skuadra që synojnë të kalojnë grupin.
Milani i Piolit, do të presë Porton në San Siro në një sfidë që ose do të mbajë gjallë ose do të shuajë përfundimisht shpresat e kuqezinjve për kalimin e grupit. Po në këtë orë, Reali i Ancelottit do të tentojë të rrëmbejë vendin e parë dhe të hedhë një hap të rëndësishëm drejt kualifikimit të mëtejshëm.
Ndërkohë, në sfidat e mbrëmjes, Dortmundi kërkon hakmarrjen ndaj Ajaxit, që e shkatërroi 3-0 në ndeshjen e fundit. Liverpool-Atletico Madrid do të jetë kryendeshja e mbrëmjes, me “The Reds” që deri më tani kanë një ecuri fantastike me 3 fitore në po kaq ndeshje, ndërsa Atletico shpreson për të dalë me pikë nga kjo ndeshje.
PSG do të udhëtojë në Gjermani për tu përballur me Leipzig, ndërsa Interi do të tentojë të ngjitet në vendin e dytë, duke zhvendosur kryesuesit e Sheriff në vendin e tretë. Ndërkohë, në grupin C, Sportingu i Lisbonës do të presë turqit e Besiktas për të kompletuar një mbrëmje spektakolare në Champions League.
