Një biznesmen nga Kamza është zhdukur prej 13 ditësh, ndërkohë që familjarët kanë denoncuar rastin në komisariatin numër 5 në kryeqytet.
Ruzhdi Hoxha, 43 vjeç që prej datës 21 tetor në orën 23:00 të mbrëmjes nuk ka kontaktuar me familjen e tij.
Burime për mediat bëjnë me dije se policia ka shoqëruar mikun që Hoxha kishte takuar për herë të fundit.
Ndërkohë ditën e sotme policia ka gjetur një celular në afërsi të Shkollës së Bashkuar, që dyshohet se i përket 43-vjeçarit.
Nuk dihet nëse Hoxha ka qenë i përfshirë në ndonjë ngjarje me natyrë kriminale, ndërkohë që grupi i hetimit po mbledh të gjitha provat për të rënë në gjurmët e tij.
43-vjeçari ka një biznes inertesh në zonën e Kamzës, dhe është baba i dy fëmijëve.
