Një ngjarje e rëndë ndodhi të premten e 5 nëntorit. Një i ri goditi me thikë dy vëllezër, duke lënë të vdekur njërin dhe plagosur rëndë personin tjetër.
Shkaku i kësaj grindjeje ishin motive të dobëta. 24-vjeçari u arrestua në lagjen “Brigada e 17 Sulmuese” në Elbasan vetëm pak orë pas ngjarjes.
Policia bëri të ditur se autori është Ardit Hida, 24 vjeç. Ai goditi me thikë në drejtim të vëllezërve Kovaçi duke lënë të vdekur Florenc Kovaçin, ndërkohë që i plagosur mbeti vëllai i tij Mikel Kovaçi. Hida është kapur nga policia në lagjen “Brigada e 17 Sulmuese” teksa po përpiqej të largohej nga qyteti i Elbasanit. Blutë kanë bërë të mundur edhe gjetjen si dhe sekuestrimin e thikës me të cilën autori qëlloi dy vëllezërit.
Njoftimi i policisë
Kapet në kohë rekord autori i dyshuar i vrasjes së 28 vjeçarit dhe i plagosjes së vëllait të tij, mbrëmjen e sotme. Sekuestrohet në cilësinë e provës materiale mjeti prerës (thikë) me të cilën autori kreu krimin. Falë reagimit në kohë të shërbimeve të Policisë të Komisariatit të Policisë Elbasan dhe ato të DVP, veprimeve të shpejta hetimore e profesionale, krehjes së zonës dhe kontrolleve të shumta, u bë e mundur kapja e autorit të dyshuar të ngjarjes së ndodhur mbrëmjen e sotme në Elbasan.
Shërbimet e Policisë kapën dhe shoqëruan në Polici për veprime të mëtejshme shtetasin Ardit Hida 24 vjeç, i cili u kap në lagjen “Brigada e 17 Sulmuese”. Gjithashtu u bë e mundur gjetja dhe sekuestrimi në cilësinë e provës materiale i thikës me të cilën ky shtetas plagosi dy vëllezërit, ku si pasojë e plagëve të marra njëri prej vëllezërve shtetasi F.K., rreth 28 vjeç, banues në Elbasan ka ndërruar jetë ndërsa vëllai tjetër shtetasi M.K.,19 vjeç, ndodhet në spital për ndihmë mjeksore.
Grupi hetimor nën drejtimin e Prokurorisë së Rrethit Gjyqësor Elbasan vijon punën për sqarimin e rrethanave të ngjarjes, identifikimin dhe arrestimin e personave të tjerë të përfshirë në këtë ngjarje.
