Mes grupimit Berisha dhe Basha, ka pasur një tentativë për të gjetur konsensus në lidhje me datën e mbajtjes së Kuvendit Kombëtar dhe mbi të gjitha rendit të ditës dhe vendimeve që do të merren. Palët i druhen mundësisë që të dështojnë në mbajtjen e Kuvendit Kombëtar për shkak të kourumit, ku nevojitet pjesëmarrja e më shumë se gjysmës së anëtarësisë.
Në mbledhjen e kryesisë së PD-së përveç grupimit të “ashpër” Basha dhe Berisha ka pasur tentativë për të gjetur një lloj kompromisi në lidhje me mbajtjen e Kuvendit Kombëtar, ku njëri është thirrur nga Berisha dhe tjetri nga Basha. Këtë e ka konfirmuar edhe Sekretari i Përgjithshëm i PD-së Gazmend Bardhi. Nëpërmjet një statusi në ‘Facebook’, Bardhi shprehet Partia Demokratike është e demokratëve që do të kuvendojnë në Kuvendin Kombëtar të PD më datë 18 Dhjetor 2021. “Qëndrimi im në mbledhjen e Kryesisë ka qenë i qartë duke synuar bashkimin dhe jo përçarjen. Për shkak të respektit që kam për kolegun Gent Strazimiri, po konfirmoj se është e vërtetë që në mbledhjen e Kryesisë kërkova që të merrnim të gjithë sëbashku një periudhë reflektimi për të gjetur rrugën që na bashkon dhe jo atë që na ndan. Për këtë propozova pezullimin e vendimmarrjes në mbledhje për të marrë pak më shumë kohë. Për të bashkuar dhe jo për të përçarë u propozova disa prej kolegëve që të kërkonin shtesë të çështjeve që ata mendojnë se duheshin përfshirë në rendin e ditës së Kuvendit Kombëtar, për të përcjellë në rrugë institucionale zërin e pakicës që mendonte ndryshe nga Kryetari”-shkruan Bardhi. Gjithashtu ai thekson se nuk është gjetur dakordësi nga pala tjetër që mbështet qartësisht linjën e Berishës. Sipas tyre, Kuvendi Kombëtar do të mbahet më datë 11 dhjetor, pasi është thirrur nga më shumë se gjysma e anëtarësisë. “Ndërsa bëja këtë propozim, kolegët ndërhynë dhe refuzuan propozimin tim, duke ripërsëritur në mbledhje qëndrimin e shpallur paraprakisht nga z. Berisha në konferencë për shtyp se “Kryesia nuk merr dot vendim, Kuvendi do të zhvillohet në datën 11 Dhjetor dhe rendi i ditës është caktuar”. Në këtë moment kam theksuar se kështu provohet që qëllimi nuk është mbajtja e Kuvendit Kombëtar, dialogu mes demokratëve dhe ndërtimi i platformës së përbashkët për rrëzimin e regjimit të Edi Ramës. Me këtë qëndrim kolegët konfirmuan se qëllimi është mbajtja peng e Partisë Demokratike për hallin personal të z. Berisha”-thekson Bardhi. Sipas tij, askush nuk ka të drejtë të marrë peng Partinë Demokratike për hallet e tij personale. “Problemet personale duhet të mbahen në shtëpi dhe jo të jenë axhendë pengmarrje për Partinë Demokratike. Partia Demokratike është e demokratëve që do të kuvendojnë në Kuvendin Kombëtar të PD më datë 18 Dhjetor 2021. Ky është Kuvendi i bashkimit të demokratëve dhe përgjigja e duhur institucionale ndaj cilitdo që prej më shumë se dy muajve i fryn vetëm zjarrit të përçarjes”, shkruan Bardhi.
Pasiguria e palëve
Deri më tani grupi pro Berishës shprehet se ka grumbulluar 4200 firma të anëtarësisë së Kuvendit Kombëtar dhe në kushte të tilla, duke iu referuar statutit gjithçka konsiderohet e ligjshme. Nga Berisha është përcaktuar data 11 dhjetor për mbajtjen e Kuvendit Kombëtar, e cila përkon edhe me 31-vjetorin e themelimit të PD-së, por erdhi edhe kundërpërgjigjja e Bashës. Statuti i PD-së përcakton se mbledhja e Këshillit Kombëtar mund të thirret edhe nga kryetari dhe diçka të tillë ka bërë edhe Basha, duke vendosur datën 18 dhjetor për mbajtjen e punimeve. Nuk është më vetëm çështje date, por përplasje mbi të gjitha për rendin e ditës dhe vendimet që do të merren nga Kuvendi Kombëtar. Pala e Berishës përcakton vendime që çojnë në shkarkimin e kreut të PD-së, ndërsa Basha ka gjetur si “klauzolë” vijimin e rrugëtimit të PD-së me atë në krye dhe me qëllimin e vetëm: rrëzimin e qeverisë Rama”. Të dyja palët kanë një qëllim të dukshëm: marrjen e partisë, kjo nga ana e Berishës, ndërsa Basha mbajtjen e drejtimit të PD-së, duke sfumuar totalisht ndikimin e Berishës, pas shpalljes së tij non-grata nga SHBA. Ndërsa qëllimet janë të kundërta, dilema mbetet që të dyja palët nuk kanë sigurinë se nga do të anojnë delegatët e Kuvendit Kombëtar. Vërtetë grupimi Berishës thekson se ka marrë 4200 firma të anëtarësisë që njohin “Kuvendin Berisha”, po a do të plotësohet kourumi i duhur më datë 11? Kjo mbetet për tu parë, pasi nëse kuvendi mbahet më datë 11 dhe arrin kourumin dhe merr vendimet, atëherë situate kalon në favorin e Berishës. Në të kundërt do pritet “Kuvendi i Bashës”, që mbahet më 18 dhjetor dhe agjendë tërësisht tjetër. Edhe aty nëvojitet kourumi i duhur, që kërkon pjesëmarrjen e më shumë se gjysmës së anëtarëve. Gjithsesi mes “palëve” të nxehta po krijohet një grupim i vogël i cili synon që të ketë një marrëveshje mes Berishës dhe Bashës, me qëllim që të quhet partia nga një përçarje mëse e mundshme.
